Imtiyozli toifaga kiruvchi shaxslar uchun elektron yoʻllanma tizimi tasdiqlandi
Hurmatli fuqarolar, Oʻzbekiston Respublikasi Prezidentining 2021-yil 28-iyuldagi PQ-5199-sonli qarorining 3-ilovasida imtiyozli toifaga kiruvchi shaxslarni hisobga olish va navbat asosida davolanishga yoʻllashning elektron axborot tizimiga integratsiya qilinadigan maʼlumotlar roʻyxati tasdiqlangan.
Mazkur qarorning 3-ilovasida masʼul vazirliklar tomonidan quyidagi imtiyozli toifaga kiruvchi shaxslarning maʼlumotlari shakllantirilgan:
Homilador ayollarning patologik holati, endokrin kasalliklar, jinsiy yoʻl bilan yuqtiriladigan kasalliklar, tuberkulyoz kasalligi, 18 yoshga toʻlmagan bolalarning kasalliklari, onkologiya kasalliklari;
Chin yetimlar, yoshga oid pensiyaga chiqib ishlamaydigan shaxslar, 1941-1945-yillardagi urush oqibatida nogiron boʻlgan shaxslar va qatnashchilari hamda ularga tenglashtirilgan shaxslar, 1941-1945-yillardagi urush davrida mehnat jabhasining qatnashchilari, Chernobil AES falokatini tugatishda ishtirok etgan shaxslar jumlasiga kiruvchi nogironlar, “Ijtimoiy himoya yagona reyestri” axborot tizimi orqali aniqlangan kam taʼminlangan oilalarga mansub shaxslar;
Baynalmilalchi-jangchilar, chaqiruv komissiyalarining yoʻllanmalari boʻyicha chaqiruv yoshidagi (18-27 yoshdagi) shaxslar;
Bolalikdan nogironligi boʻlgan shaxslar, I va II guruh nogironligi boʻlgan shaxslar roʻyxatlari.
Hurmatli fuqarolar, yuqorida qayd etilgan Oʻzbekiston Respublikasi Prezidenti qarorining tartib-tamoyillariga asosan imtiyozli toifaga kiruvchi shaxslarning imtiyozli elektron yoʻllanmasi oʻz hududingizdagi oilaviy poliklinikadan boshlab shakllantiriladi va bemorlar imtiyozli elektron yoʻllanma asosida shifoxonaga davolanishga yotgunga qadar sogʻliqni saqlash tizimi xodimlari masʼul hisoblanadi.
Hurmatli fuqarolar, ixtisoslashtirilgan muassasalarda imtiyozli yoʻllanma bilan davolanishda koʻrsatilgan tibbiy yordam hajmi va sifati yuzasidan eʼtirozlaringiz boʻlsa quyidagi manzillarga murojaat qilishingizni soʻraymiz.
DTSJ Matbuot va PR xizmati