Davlat tibbiy sugʻurtasi jamgʻarmasining xodimlari qon topshirish aksiyasida ishtirok etishdi

Bugun Davlat tibbiy sugʻurtasi jamgʻarmasi Ijro etuvchi apparati, Toshkent shahar, Sirdaryo hamda Surxondaryo viloyatlari hududiy boʻlinmalarining bir guruh xodimlari ijtimoiy maʼsuliyatni his qilgan holda, qon topshirish aksiyasida ishtirok etishdi. Bu tadbir xodimlarimizning hamyurtlarimizning hayotiga befarq emasligi, muhtojlarga yordam berish istagi balandligini bildiradi.

Donorlikning ahamiyati

Maʼlumki, qon bemorlar uchun bebaho va juda muhimdir. Har yili minglab odamlar murakkab jarrohlik amaliyotlarini oʻtkazish, ogʻir kasalliklarni davolash va jarohatlardan tiklanish uchun qonga muhtoj boʻladi. Donor qoni koʻplab insonlar hayotini saqlab qolish va bemorlar holati yaxshilanishini taʼminlaydi.

Xodimlarimiz – qahramonlarimiz

Biz xodimlarimiz nafaqat oʻz xizmat vazifalarini yuqori darajada bajarayotganidan, balki shunday muhim ijtimoiy tadbirlarda shaxsiy tashabbus koʻrsatayotganidan faxrlanamiz. Har bir qon topshirgan xodimimizning hissasi shubhasiz kimningdir hayotini saqlab qoladi. Bu yaqinlarga gʻamxoʻrlik va ijtimoiy masʼuliyat namunasidir.

Minnatdorchilik

Qon topshirish aksiyasida ishtirok etgan barcha xodimlarimizga katta minnatdorchilik bildiramiz. Siz jamoat salomatligi va farovonligi uchun beqiyos hissa qoʻshdingiz. Boshqalar uchun namuna boʻlishda davom eting!

DTSJ Matbuot va PR xizmati